|
Obsesiones, relatos, viaxes, invenciones, sueños que se cuenta ún falándose, a la escuita del corazón, nel falaxe tresparente de la memoria; estos son dalgunos de los ingredientes que s entrían, no l.leite de la l.luz qu afuxíu, pa componer Unas poucas cousas guapas, un l.libru que l autor quixera de celebración de las cousas guapas que vivíu, pero que miedu-y da que se convierta n elexía. ¿Pueden ser las palabras de casa, que se dicen con harmonía ya xeitu, un guindón qu atrape los días pasaos? La belleza, ¿tien una fórmula secreta que pódamos destilar? El laberintu de la propia vida, ¿vei a las vueltas del tiempu componiendo una imaxe simbólica? Esas son dalgunas de las cousas que Xuan Bello (Paniceiros, 1965) s entruga afondando, inda más, no vértigu de la sua obra. Vuelve esta vez, impelíu por una voz antigua, a la fala de sua casa convencíu de que la l.lingua estándar, ente outras cousas, tien que ser un dique que contenga ya derrouque a la vez. Ordenar las palabras de la tribu ía namás un peldañu: onde se chegue ía dalgo que se verá._x000D_ Xuan Bello escribíu dalgún de los l.libros más formosos de la nueva l.literatura asturiana. Como poeta, rescampla con Los nomes de la tierra (1990), El llibru vieyu (1993) y Los caminos secretos (1995), axuntaos con outros volúmenes anteriores en La vida perdida (2001) y el de recién Ambos mundos (2010). Cumo narrador, publicóu más d una ventena de títulos, ente los que destacamos la sua celebrada Hestoria universal de Paniceiros (2003), La nieve y otros complementos circunstanciales (2006), Al dios del llugar (2007), La hestoria tapecida (2008) ya la sua última novela, La confesión xeneral (2008). Ta traducíu al castel.lanu, gal.legu, catalán, inglés, italianu ya griegu, ente outras l.linguas.
|